Il Passante

Scena: Campagna veneta, due vecchietti, un cantiere aperto

«Toni, ti gà visto cossa che xè drio far?»
«Sì, vedo, ma miga go capìo: i sbanca tera da ‘na parte, i porta tera dal’altra, i rumega dapartuto…»
«Xè che i xè drio far el Passante…»
«El Passante?»
«Sì, el Passante!»
«Oh Marìavergine, e cossa ‘l xè el Passante?»
«Eh ma ti sa proprio niente, ostrega! El xè ‘na specie de autostrada.»
«E la ga da passar proprio par de qua, da nialtri?»
«Eh, ciò, sì, ah! No ti ga sentìò el Sindaco, che gà dito che semo fortunai che ‘l ne pasa sotto casa?»
«Ah, sì, certo. Xé par quelo che lu ga cambià casa subito, el Sindaco, e se ne ga comprà una dove che el Passante no pasa…»
«Eh, ma cosa ti vol dir, ti ti vedi sempre la malissia dove che la ghe xè…»
«Eh, so cativo, mi. Ti invese, no ti la vol vedar neanca co i te la sbate sul muso…»
«Tuta invidia, parchè questa la xè ‘na grande opera! Cossa ti credi, che sia boni tuti a farla?»
«No, no, par carità, che no tuti sia boni a far ste robe so d’acordo… ma ti me spieghi cossa che i xè drio combinar? Parchè più che vardo, manco capisso. Da una parte i xè drio costruir ‘na galeria e ‘na trincea che manco fussimo sul Piave ai tempi de Caporetto, e i scava come se i fusse dele talpe; da staltra parte i xè drio tirar su piloni alti quindese metri, come se i gavesse da far un ponte sul Stretto… no i lo doveva far a Mesina, el ponte? I ga cambià idea e i lo fa da nialtri?»
«Ma, no, ebete! Xè che da una parte i gà da far la trincea, perché i va massa visin ai case, e alora, par non butar zò tuto, che senò ghe tocava pagar un mucio de schei a quei che abita de là, i gà deciso de interàr la strada per un pocheti de metri e po’ i fa passar tuti dentro ‘na galeria. Po’, quando che i gà passà e case, i va su, co un ponte, perché i se gà inacorto che se i continua in galeria, i se trovava tute e falde acquifere che alagava tuto, e alora i fa un ponte e ghe passa de sora…»
«E le machine le andarà su e zò, da la galeria al ponte e po’ da novo in galeria?»
«Eh ciò, come vustu far, altrimenti?»
«Toni, va ben che xè i tui, ma ti me spieghi ‘na roba?»
«Dime, Bepi..»
«Ma co ‘ ti entri al caselo, ti paghi el pedagio par entrar in autostrada, o el biglieto par andar su le montagne russe?»